Muqdisho (SONNA): Ra’iisul Wasaare Kuxigeenka Xukuumadda Federaalka Soomaaliya, Mudane Saalax Jaamac, ayaa maanta kormeer shaqo ku tagay xarunta Wasaaradda Hawlaha Guud, Dib u Dhiska iyo Guriyeynta ee Dowladda Federaalka Soomaaliya.
Mudane Saalax Jaamac waxaa halkaas si diirran ugu soo dhaweeyay Wasiirka Wasaaradda Hawlaha Guud, Dr. Cilmi Maxamuud Nuur, Wasiir Kuxigeenka Wasaaradda mudane Maxamed Xuseen Gaaraxo, Agaasimaha Guud mudane Faarax Cabdinuur Axmed iyo mas’uuliyiin kale oo ka tirsan hoggaanka waaxyaha iyo madaxda mashaariicda Wasaaradda.
Intii uu kormeerka socday, Mudane Saalax Jaamac ayaa si gaar ah u kuur galay mashaariicda horumarineed ee ay Wasaaraddu fulinayso, kuwaas oo ay ka mid yihiin Mashruuca Nagaad, oo diiradda saaraya dhismaha waddooyinka iyo biyo-xireennada dalka, kuwaas oo si hufan uga socda gobollada kala duwan ee Soomaaliya.
Intaa kadib, waxaa lagu soo bandhigay warbixinno iyo muuqaallo muujinaya waxqabadka wasaaradda ee qeybta ay kaga jirto Barnaamijka Dan-Qaran, kaas oo muhiim u ah horumarinta kaabeyaasha dhaqaalaha iyo adeegyada bulshada.
Dhankiisa, Wasiirka Wasaaradda Hawlaha Guud, Dr. Cilmi Maxamuud Nuur, ayaa uga mahadceliyay Ra’iisul Wasaare ku xigeenka XFS kormeerkiisa, isagoo xusay in wasaaraddu ay ka go’an tahay hufnaan, daahfurnaan, iyo fulinta ballanqaadyada Xukuumadda Dan-Qaran, si loo sii xoojiyo dadaallada dib u dhiska iyo guriyeynta shacabka Soomaaliyeed.
