𝐓𝐀𝐇𝐈𝐑𝐘 𝐄𝐎𝐑𝐎𝐏𝐄𝐀𝐍𝐀: 𝐇𝐀𝐌𝐏𝐈𝐓𝐎𝐌𝐁𝐎𝐈𝐍𝐀 𝐍𝐘 𝐅𝐀𝐍𝐎𝐇𝐀𝐍𝐀𝐍𝐀 𝐀𝐍’𝐈 𝐌𝐀𝐃𝐀𝐆𝐀𝐒𝐈𝐊𝐀𝐑𝐀

𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-26 𝒇𝒆𝒃𝒓𝒐𝒂𝒓𝒚 2026]

Manohana sy mandray anjara amin’ny fanatanterahana ny Pôlitika Ankapoben’ny Fitondrana Fanavaozana, ny Vondrona Eoropeana.

Dinika sy fifanakalozan-kevitra mahakasika izany, indrindra momba ny fampiasana ny Tahiry Eoropeana, no votoatin’ny fihaonana teo amin’ny Praiminisitra, Lehiben’ny Governemanta, Rajaonarivelo Herintsalama Andriamasy, sy ny delegasiaon’ny Vondrona Eoropeana, notarihin’ny Ambasadaoro, Roland Kobia, teto Mahazoarivo, androany. Nanatrika ny adihevitra ihany koa ny Minisitry ny Toekarena sy ny Fitantanam-bola, Dr. Ramiarison Herinjatovo, sy ny Lehiben’ny sampana Pôlitika ao amin’ny Vondrona Eoropeana, Laurent D’Ersu ary ny Lehiben’ny fiaraha-miasa, Roberto Schiliro.

Notsiahivin’ny Praiminisitra, ireo laharampahamehan’ny fitondrana ankehitriny, toy ny fanaingana ny sehatry ny toekarena sy ny fijerena akaiky ny fampivoarana ny fiainan’ny vahoaka Malagasy. Ankoatr’ireo ny fametrahana ny fomba fiasa anatin’ny mangarahara sy ny ady atao amin’ny kolikoly eo amin’ny sehatra rehetra. Zavadehibe, hoy izy, ny fisian’ny mpiara-miombon’antoka toy ny Vondrona Eoropeana, izay vonona hatrany mifanome tanana ho fampandrosoana an’i Madagasikara.

Ny 90%n’ny fanampiana ho an’ny Firenena malagasy, azo avy amin’ny alalan’ny Tahiry Eoropeana, dia fanomezana tsy averina, ary eo koa ny fampindramam-bola ataon’ny « Banque européenne d’investissement » (prêt à taux réduits). Ireo rehetra ireo no niaraha-nijery ny fomba hampiasana azy amin’ny tokony ho izy sy ny hahafahana mampitombo ny fanampiana an’i Madagasikara.